2017 йил 17-ноябр куни Халқаро бизнес марказининг 7-қават “Навоий” залида Ўзбекистон врачлар ассоциациясининг (ЎВА) навбатдан ташқари конференцияси бўлиб ўтди. Конференцияда Қорақалпоғистон Республикаси, Тошкент шахар ва барча вилоятлардан, жамоа аъзолари томонидан хамда Республика ихтисослаштирилган тиббиёт марказларидан сайланган делегатлар иштирок этишди. Конференция очилишида биринчи бўлиб, ЎВА раисининг ўринбосари Т.И.Искандаров нутқ сўзлаб, ЎВА нинг асосчиси, биринчи раиси хозирги кунда марҳум профессор Худайбергенов Абдулла Маткаримовични рухларини хотирлаб, ЎВА ташкил қилиниши ва шу кунда эришган натижалари шахсан Абдулла Маткаримович ва у ташкил қилган жамоа аъзоларининг тинимсиз меҳнати натижаси эканлигини таъкидлади.

Шундан сўнг конференцияни очиқ деб эълон қилинди. Конференцияда Ўзбекистон врачлар ассоциацияси раиси в.в.б. Сидиков З.У. “Ўзбекистон врачлар ассоциацияси: тарихга назар ва истиқболли режалар” номли маърузасида ЎВА ташкил этишда иштирок этганларни номларини бирма-бир эслаб ўтди. Шу билан бирга Республикамизда тиббиёт соҳасида эришилаётган улкан ютуқлар, бунда Ассоциациясининг ўрни ва фаолияти ҳақида сўз юритиб, кейинги йилларда ташкилот олдида турган асосий йўналишлар, жумладан шифокорнинг обрў-эътиборини мустаҳкамлаш, уларнинг дардини билиш ва имкон қадар муаммоларини ечишга қаратиш кераклигини алоҳида таъкидлаб ўтди.
Ўзбекистон врачлар ассоциациясининг фаолиятига оид материаллар Конференцияси делегатлари ва иштирокчилари томонидан муҳокама этилди.
ЎВАнинг Қорақалпоғистон Республикаси, Хоразм, Андижон, Қашқадарё, Тошкент вилоят бўлими раислари, Хусусий тиббиёт ассоциацияси раиси А.Ш.Ваисов, Ўзбекистон Республикаси Соғлиқни сақлаш вазирлигининг Назорат инспекцияси бошлиғи А.А.Агзамов, РИЭИАТМ директори А.В.Алимов ва бошқа иштирокчилар ўз таклиф ва мулохазаларини билдирдилар.

Ўзбекистон врачлар ассоциацияси Уставига биноан Конференция делегатларининг яширин ёки очиқ овоз бериш йўли билан Ассоциация раиси сайланади. Конференция давомида ЎВА янги раисни сайлаш масаласи кўрилди.
Т.И.Искандаров сўзга чиқиб, ЎВА ташкил этилгандан бери раис ўринбосари, хозирда Республика ихтисослаштирилган кўз микрохирургия маркази директори Зафар Умарович Сидиқов номзодини таклиф этди.
Қорақалпоғистон Республикаси, Тошкент шахар ва барча вилоятлардан, жамоа аъзолари томонидан
сайланган делегатлар томонидан Ўзбекистон врачлар ассоциацияси раиси лавозимига Сидиков Зафар Умарович номзоди тасдиқланди.
Анжуман якунида ЎВА раиси З.У.Сидиков барча конференция делегатларининг ишончлари учун миннатдорчилик билдириб, соғлиқ ва ижодий муваффақиятлар тилади.

Ташкилий қўмита